එක | ONE

විභීෂණ කියන ආරූඪ නමින් පෙනී ඉන්න මම "විභීෂණ අඩවිය" පටන් ගන්න කලියෙන් අවුරුදු දෙකක් විතර බ්ලොග් ලෝකේ එහෙට මෙහෙට රස්තියාදුවේ රවුම් ගගහා හිටපු චරිතයක් විය.

සිංහල බ්ලොග් ගැන ඊටත් කලියෙන් පත්තරේ ගිය සමහ ර ආටිකල් දැකලා කියෝලා දැනන් හිටියාට අර අපි කටවහරට කියන "බ්ලොගට ගොඩ වීම " කියන දේ සිද්ද වුනේ 2012 මැද  හරියේ වගේ අහම්බෙන් වගේ බුකියේ තිබ්බ ලින්ක් එකක් කොටන්න යාමෙන් ය. එදා ඒ අහම්බෙන් වගේ ගොඩ වුනේ "චමී ගේ බ්ලොග් අඩවිය " ටය. අවාසනාවට මේ වෙනකොට බේ බ්ලොග් එක තිබ්බාය කියලා සලකුණක්වත් මට හොයාගන්න නැත. දන්නා කෙනෙක් ඉන්නවා නම් ලින්ක් එකක් දෙන්න.

චමීගේ අඩවියේ තිබුනේ ඔක්කොම එක එක ජාති ගැජට් බැජට් ගැනය. වැඩේ හොඳටම හිතට අල්ලලා ගියේය.

ඊට පස්සේ ටික ටික ගූගල් දේවයා ගේ පිහිටෙන් හෙලබ්ලොග් ආකාහේ පීරන්න පටන් ගත්ත මට ටික කාලෙකින්ම "තහනම් අඩවිය" ට රිංග ගන්න හේතු වාසනා ලැබුනේය. ලිව්වේ "අඩවි රජා" ය. තහනම් අඩවියට රිංගපු හැමෝම ආපහු එලි බැස්සේ ලේ පයින්ට් ගණන් සුද්ද කර ගෙන බව සහසුද්දෙන්ම වගේ කියන්න විභීෂණ ට පුළුවන. ගොඩවෙච්ච එවුන් දන්නවා ඇතිනේ තහනම් අඩවියේ කොලිටි එක ගැන.

එදා හැමෝටම ගොඩවෙන්න පුළුවන් විදියට තිබ්බ "තහනම් අඩවිය " අද වචනයේ පරිසමාප්තාර්ථයෙන්ම අද " තහනම්"වෙච්ච අඩවියක් බව කියන්නේ එච්චර හොඳ හිතකින් නොවය.

සිංහල බ්ලොග් වල සීමාව තියෙන්නේ අහසේ බව තේරුම් ගත්තේ මෙන්න මේ තහනම් අඩවියේ රවුම් ගැහීමෙන් ය. 

ඉතින් ඇස්වහක් කටවහක් නැහැ හැමෝටම හැදෙන ලෙඩේ ඒ කියන්නේ "මගේම කියල බ්ලොග් එකක් හැදීමේ " ඒ සුන්දර සිහින ලෙඩේ මම තුමාටද බෝ වුනේය. ඉතින් හැදුවා තමයි . මුලින්ම හදාපු එක ඉතින් මගේ නම ම බ්ලොග් නේම් එක විදියට තිබ්බ එකක් විය. ලිව්වේ එකම එක පොස්ටුවක් විතරය. එකත් වෙල්කම් නෝට් එකක් ය. මේ ලඟක් වෙනකම් ම එක තිබුනා වගේ මතකය. ඒකාලේ ඉතින් ඔය අනම් මනම් සින්ගිරිස් ටයිපින් දන්නේ නැති හින්දා ලියාපු හැම මගුලම ලියෙව්වේ ඉංගිරිසියෙන් ය.

ඊට පස්සේ ටික ටික බ්ලොග් වලට ඇබ්බැහි වෙලා අර කලින් එක නැතුව අලුත්ම බ්ලොගක්  එකක් පටන් ගන්න ආපහු මටම හිතුනේය. ඉතින් හිතුවා වගේම පටන් ද ගත්තේය.එකේ නම "X page " ය.  තිස්තුන් කෝටියක් දෙවි දේවතාවුන් වහන්සේලාට පින් සිද්ද වෙන්න එකත් ඉංගිරිසියෙන් ලියෝපු වෙල්කම් පොස්ට් එහෙකට සීමා විය.

එක අතැරලා දාලා ටික කාලයක් , ඒ කියන්නේ මාස තුනක් විතර ගිහින් ආපහු ලෙඩේ උත්සන්න විය. ආපහු බ්ලොගක් නිර්මාණය විය.නම තිබ්බේ "හෙලෝ ******" කියලා ය. ඔය තරු ලකුණු වෙනුවට මගේ ඇත්ත නම ආදේශ විය යුතුය. ඔන්න ඕකේ නම් පොස්ට් දෙකක් විතර ලීවා වගේ යාන්තමට මතකය. ඒ වෙනකොට ගූගල් ඉන්පුට් ටූල් දැනන් හිටපු හින්දා ගේමක් නැතිව හිංගල ටයිපින් කරන්න විභී යාට පුළුවන.

පොස්ට් දෙකක් ලිව්වත් අයියෝ බලන්න එකෙක්වත් නැත. බ්ලොග් හැදුවා කියලා මිනිස්සු කියවන්න එන්නේ නැති බවත් ඒකට පොඩි පබ්ලිසිටි පාරක් දෙන්න ඕනා කියලාත් තේරුනේ පස්සෙන් පහු වෙනකොට ය. එතකොට මේ බ්ලොගත් අතැරලා දාලා මාස ගානක් ගොසින් ය.

තාමත් බ්ලොග් ෆීව්ර් එක හොඳ නැත. දෙදාස් දහතුනේ නොවැම්බර් මුලද කොහේදෝ ආපහු පාරක් අසනීපෙ හොඳ කර ගන්න කියලා හිතාගෙන බ්ලොගක් ඇටෙව්වේ ය. නම "සීමිත ****"ය.

මේ වෙනකොට මාතලන් ගේ සින්ඩිය, අර සින්ඩිය මේ සින්ඩිය ගැන එහෙම දැනන් උන්නු හින්දා බ්ලෝග අටෝලා එතුමන්ලාටත් දැනුම් දෙන මම තුමා අමතක නොකළේය.

සින්ඩි හෙල්ප් එක්ක ඉල්ලලා දාපු ඊමේල් වලට මුලින්ම රිපල්යි කරලා තමුන්ගේ සින්ඩියේ අලෝලා තියාගත්තේ අපේ බ්ලොග් ප්‍රොෆෙසර් මාතලන් ය. බ්ලොග් ලෝකේ අලුතෙන් ඉපදෙන එවුන්ට අත දෙන එක  උන්නැහැගේ  ගතිගුණයක් නිසා අපි හැමෝටම මාතලන් ගේ උදව් ලබා ගැනීම් භාග්‍යය හිමි විය. 

ඔය කියන බ්ලෝග අටෝලා එක එක විදියේ එක්ස්පෙරිමන්ට් අටෝරාශියක් කරන්න විභීෂණ පටන් ගත්තේ ඇත්තටම මට ලියන්න පුළුවන් මොන වගේ දේවල් ද , ලියන්න ඕනේ කොහොමද වගේ දේවල් දන කියා ගන්න ටය. ටික ටික බ්ලෝග එක එකා අතරට යන්න පටන් ගන්නකොට ඔමා, බස්සි, අටම්, දේශා, කෙන්ජා, සැමා, සමකය වටේ නලින් ,කතන්දර වගේ බ්ලොග් සැට් එකක් ම අඳුරගන්න විභී වෙන්න කලින් හිටපු මට හැකි විය. 

කොහොම හරි මේ බ්ලොගේ දාපු හැම පොස්ටුවක් ගැනම , එකට වැටෙන හිට්ස්,කොමෙන්ට්ස් ගැන එහෙම හොම්ද කල්පනාවෙන් එදා විභී යා පසු වුනේ අර හරියටම මැච් වෙන ඉට්ටයිල් එක හොයා ගන්න ටය. කමෙන්ට් බින්දු වටිච්චා විසිපහක් විතර තිබ්බා වගේ මතකය. තව පහළොවක් විතර කමෙන්ට් දෙකක් හෝ එකක් පමණි. ඔහම ඉන්න අතරේ එක්තරා දවසක එක්තරා දේශපාලන කාරනාවක් ගැන පොස්ටුවක් මගේ ඒ පරණ බ්ලොගේ ලියලා අතැරලා දැම්මේ පාඨක ප්‍රතිචාරය කොහොම වෙයිද කියලා බලන්න ය. හිතුවෙවත් නැති විදියට කමෙන්ට් ගලා ගලා එන්නට විය. සමහරු මාව මාතලන් ඉට්ටයිල් එකට සමාන කරලා ද තිබුනේය. වැඩේ හරි ගියේය. ලියන්න ඕන මොන වගේ දේවල් ද , මොන විදියට කියලා හම්බ විය.

දැන් තියෙන්නේ ලියන්න ය. එත් ප්‍රශ්නෙකට තියෙන්නේ හිතේ තියෙන ඔක්කොම ලියන්න ගියොත් වැඩි කල් නොගොස් මොකක් හෝ මරාලයක් පාත් වෙන්න ඒකාලේ ලොකු ඉඩක් තිබුණු එකය. ඒ හින්දා වහන්නේ නැතුව දිගටම ලියන්න තියාගෙන හිටපු ඒ බ්ලොගත් අත ඇරලා "විභීෂණ " කියලා ෆේක් නමක් එක්ක ප්‍රොෆයිල් එහෙකුත් හදා ගෙන " ආයුබෝවේවා" කියලා පලවෙනි පොස්ටුවත් ලියාගෙනම "විභීෂණ අඩවිය " කියන මේ බ්ලෝග ආරම්භ කළේය. 

මේ වගේ පොස්ටුවක් අද දාන්න හේතු භූත වුනෙත් ඔන්න ඕකය. ඒ කියන්නේ විභීෂණ අඩවිය පටන් ගත්තේ , බ්ලොග් ලෝකෙට ඇතුල් වුනේ 2014 අගෝස්තු 01 වෙනිදා වීමය.

ඒ කියන්නේ අද විභීෂණ අඩවියේ පලවෙනි ඇණිවසරි එකය. 

ලියන හැටිත් දැනගෙන , ලියන්න ඕන මොනවාද කියලත් දැනගෙන අද වෙනකොට  එක එක මාතෘකා ගැන එක එක කතා බහ මේ අඩවිය ඇතුලේ සිද්ධ වී ඇත.

ලියාපුවා කියවන්න, බනින්න, වලි දාගන්න සැට් එකක් ම විභීෂණ හදාගෙන අවසන් ය. 

ඒ හින්දා බොහොම හොඳ ඩිජිටල් රිලෙෂන්ශිප් එකක් හදාගන්න විභීෂණ නමින් වෙස්වාලන් ඉන්න මට හැකි වෙලා ය.

ඉතින් අවුරුද්දක් තිස්සේ විභීෂණ එක්ක හිටපු හැමෝම එක්ක දිගටම බ්ලොග් ලෝකේ සැරිසරන්න විභීෂණ සූදානම් ය.

ඔන්න හැමෝටම කිවා, 

එහෙනම් ආයෙත් හම්බුවෙනකන්, ගොහින් එන්නම්.